मुख्यपान » सीलनिद्देसो
A+ R A-

सीलनिद्देसो

ई-मेल प्रिंट
पठमो परिच्छेदो
सीलनिद्देसो


नमो तस्स भगवतो अरहतो सम्मासम्बुद्धस्स

१.  ''सीले परिट्ठाय नरो सपञ्ञो, चित्तं पञ्ञञ्च भावयं ।

आतापी निपको भिक्खु, सो इमं विजटये जठं'' ति [सं १।१३] ॥
इति हिदं वुत्तं । कस्मा पनेतं वुत्तं ?  भगवन्तं किर सावत्थियं विहरन्तं रत्तिभागे अञ्ञतरो देवपुत्तो उपसङ्कमित्वा अत्तनो संसयसमुग्घातत्थं,

''अन्तो जटा बहि जटा, जटाय जटिता पजा ।

तं तं गोतम पुच्छामि, को इमं विजटये जटं'' ति [सं १।१३] ॥
इमं पञ्हं पुच्छि ।

२.  तस्सायं सङ्खेपत्थो ।  जटा ति तण्हाय जालिनिया एतं अधिवचनं ।  सा हि रूपादिसु आरम्मणेसु हेट्ठूपरियवसेन पुनप्पुनं उप्पज्जनतो संसिब्बनट्ठेन वेळुगुम्बादीनं साखाजालसङ्खाता जटा विया ति जटा ।  सा पनेसा सकपरिक्खार-परपरिक्खारेसु, सकत्तभावपरत्तभावेसु, अज्झत्तिकायतन-बाहिरायतनेसु च उप्पज्जनतो अन्तो जटा बहि जटा ति वुच्चति ।  ताय एवं उप्पज्जमानाय जटाय जटिता पजा ।  यथा नाम वेळुजटादीहि वेळुआदयो, एवं ताय तण्हाजटाय सब्बा पि अयं सत्तनिकायसङ्खाता पजा जटिता ।  विनद्धा, संसिब्बिता ति अत्थो ।  यस्मा च एवं जटिता, तं तं गोतम पुच्छामी ति, तस्मा तं पुच्छामि ।  गोतमा ति भगवन्तं गोत्तेन आलपति ।  को इमं विजटये जटं ति, इमं एवं तेधातुकं जटेत्वा ठितं जटं को विजटेव्य ?  विजटेतुं को समत्थो ति पुच्छति ।

३.  एवं पुट्ठो पनस्स सब्बधम्मेसु अप्पटिहतञाणचारो देवदेवो, सक्कानं अतिसक्को, ब्रह्मानं अतिब्रह्मा, चतुवेसारज्जविसारदो, दसबलधरो, अनावरणञाणो, समन्तचक्खु भगवा तमत्थं विस्सज्जेन्तो,

''सीले पतिट्ठाय नरो सपञ्ञो, चित्तं पञ्ञञ्च भावयं ।

आतापी निपको भिक्खु, सो इमं विजटये जटं'' [सं १।१३] ॥
इमं गाथमाह ।

४.  इमिस्सा दानि गाथाय कथिताय महेसिना ।
वण्णयन्तो यथाभूतं अत्थं सीलादिभेदनं ॥
सुदुल्लभं लभित्वान पब्बज्जं जिनसासने ।
सीलादिसङ्गहं खेमं उजुं मग्गं विसुद्धिया ॥
यथाभूतं अजानन्ता सुद्धिकामा पि ये इध ।
विसुद्धिं नाधिगच्छन्ति वायमन्ता पि योगिनो ॥
तेसं पामुज्जकरणं सुविसुध्दविनिच्छयं ।
महाविहारवासीनं देसनानयनिस्सितं ॥
विसुद्धिमग्गं भासिस्सं, तं मे सक्कच्च भासतो ।
विसुद्धिकामा सब्बे पि निसामयथ साधवो ति ॥

पुढे वाचा

यशवंतराव चव्हाण प्रतिष्ठान निर्मित महत्वपूर्ण संकेतस्थळे..