मुख्यपान » कम्मट्ठानगहणनिद्देसो
A+ R A-

कम्मट्ठानगहणनिद्देसो

ई-मेल प्रिंट
ततियो परिच्छेदो
कम्मट्ठानगहणनिद्देसो


१.  इदानि यस्मा एवं धुतङ्गपरिहरणसम्पादितेहि अप्पिच्छतादीहि गुणेहि परियोदाते इमस्मिं सीले पतिट्ठितेन, ''सीले पतिट्ठाय नरो सपञ्ञो, चित्तं पञ्ञञ्च भावयं'' ति [१।१] वचनतो चित्तसीसेन निद्दिट्ठो समाधि भावेतब्बो, सो च अतिसङ्खेपदेसितत्ता विञ्ञातुम्पि ताव न सुकरो, पगेव भावेतुं, तस्मा तस्स वित्थारञ्च भावनानयञ्च दस्सेतुं इदं पञ्हाकम्मं होति - को समाधि ?  केनट्ठेन समाधि ?  कानस्स लक्खण-रस-पच्चुपट्ठान-पदट्ठानानि ?  कतिविधो समाधि ?  को चस्स सङ्किलेसो, किं वोदानं ?  कथं भावेतब्बो ?  समाधिभावनाय को आनिसंसो ति ?

२.  तत्रिदं विस्सज्जनं ।  को समाधी ति ?  समाधि बहुविधो नानप्पकारको ।  तं सब्बं विभावयितुं आरब्भमानं विस्सज्जनं अधिप्पेतञ्चेव अत्थं न साधेय्य उत्तरिञ्च विक्खेपाय संवत्तेय्य ।  तस्मा इधाधिप्पेतमेव सन्धाय वदाम - कुसलचित्तेकग्गता समाधि ।

३.  केनट्ठेन समाधी ति ?  समाधानट्ठेन समाधि ।  किमिदं समाधानं नाम ?  एकारम्मणे चित्तचेतसिकानं समं सम्मा च आधानं ।  ठपनं ति वुत्तं होति ।  तस्मा यस्स धम्मस्सानुभावेन एकारम्मणे चित्तचेतसिका समं सम्मा च अविक्खिपमान अविप्पकिण्णा च हुत्वा तिट्ठन्ति, इदं समाधानं ति वेदितब्बं ।

४.  कानस्स लक्खण-रस-पच्चुपट्ठान-पदट्ठानानी ति एत्थ पन, अविक्खेपलक्खणो समाधि, विक्खेपविद्धंसनरसो, अविकम्पनपच्चुपट्ठानो, ''सुखिनो चित्तं समाधियती ति [ दी १।७३] वचनतो पन सुखमस्स पदट्ठानं ।

५.  कतिविधो समाधी ति ?  अविक्खेपलक्खणेन ताव एकविधो ।  उपचार-अप्पनावसेन दुविधो, तथा लोकिय-लोकुत्तरवसेन, सप्पीतिक-निप्पीतिकवसेन, सुखसहगत-उपेक्खासहगत-वसेन च ।  तिविधो हीन-मज्झिम-पणीतवसेन, तथा सवितक्क-सविचारादिवसेन, पीतिसहगतादिवसेन, परित्त-महग्गतप्पमाणवसेन च ।  चतुब्बिधो दुक्खापटिपदादन्धाभिञ्ञादिवसेन, तथा परित्तपरित्तारम्मणादिवसेन, चतुझानङ्गवसेन, हानभागियादिवसेन, कामावचरादिवसेन, अधिपतिवसेन च ।  पञ्चविधो पञ्चकनये पञ्चझानङ्गवसेना ति ।

६.  तत्थ एकविधकोट्ठासो उत्तानत्थो येव ।  दुविधकोट्ठासे, छन्नं अनुस्सतिट्ठानानं, मरणसतिया, उपसमानुस्सतिया, आहारे पटिक्कूलसञ्ञाय, चतुधातुववत्थानस्सा ति इमेसं वसेन लद्धचित्तेकग्गता, या च अप्पनासमाधीनं पुब्बभागे एकग्गता, अयं उपचारसमाधि ।  ''पठमस्स झानस्स परिकम्मं पठमस्स झानस्स अनन्तरपच्चयेन पच्चयो'' ति [पट्ठान २।४३०] आदिवचनतो पन या परिकम्मानन्तरा एकग्गता, अयं अप्पनासमाधी ति ।  एवं उपचारप्पनावसेन दुविधो ।

पुढे वाचा

यशवंतराव चव्हाण प्रतिष्ठान निर्मित महत्वपूर्ण संकेतस्थळे..