मुख्यपान » पथवीकसिणनिद्देसो
A+ R A-

पथवीकसिणनिद्देसो

ई-मेल प्रिंट
चतुत्थो परिच्छेदो
पथवीकसिणनिद्देसो


१.  इदानि यं वुत्तं, समाधिभावनाय अननुरूपं विहारं पहाय अनुरूपे विहारे विहरन्तेना ति [३।२८] एत्थ, यस्स ताव आचरियेन सद्धिं एकविहारे वसतो फासु होति, तेन तत्थेव कम्मट्ठानं परिसोधेन्तेन वसितब्बं ।  सचे तत्थ फासु न होति, यो अञ्ञो गावुते वा अङ्ढयोजने वा योजनमत्ते पि वा सप्पायो विहारो होति, तत्थ वसितब्बं ।  एवं हि सति कम्मट्ठानस्स किस्मिञ्चिदेव ठाने सन्देहे वा सतिसम्मोसे वा जाते कालस्सेव विहारे वत्तं कत्वा अन्तरामग्गे पिण्डाय चरित्वा भत्तकिच्चपरियोसाने येवाचरियस्स वसनट्ठानं गन्त्वा तं दिवसं आचरियस्स सन्तिके कम्मट्ठानं सोधेत्वा दुतियदिवसे आचरियं वन्दित्वा निक्खमित्वा अन्तरामग्गे पिण्डाय चरित्वा अकिलमन्तो येव अत्तनो वसनट्ठानं आगन्तुं सक्खिस्सति ।  यो पन योजनप्पमाणे पि फासुकट्ठानं न लभति, तेन कम्मट्ठाने सब्बं गण्ठिट्ठानं छिन्दित्वा सुविसुद्धं आवज्जनपटिबद्धं कम्मट्ठानं कत्वा दूरम्पि गन्त्वा समाधिभावनाय अननुरूपं विहारं पहाय अनुरूपे विहारे विहातब्बं ।

२.  तत्थ अननुरूपो नाम अट्ठारसन्नं दोसानं अञ्ञतरेन समन्नागतो ।  तत्रिमे अट्ठारस दोसा-महत्तं, नवत्तं, जिण्णत्तं, पन्थनिस्सितत्तं, सोण्डि, पण्णं, पुप्फं, फलं, पत्थनीयता, नगरसन्निस्सितता, दारुसन्निस्सितता, खेत्तसन्निस्सितता, विसभागानं पुग्गलानं अत्थिता, पट्टनसन्निस्सितता, पच्चन्तसन्निस्सितता, रज्जसीमसन्निस्सितता, असप्पायता, कल्याणमित्तानं अलाभो ति ।  इमेसं अट्ठारसन्नं दोसानं अञ्ञतरेन दोसेन समन्नागतो अननुरूपो नाम, न तत्थ विहातब्बं ।

३.  कस्मा ?  महाविहारे ताव बहू नानाछन्दा सन्निपतन्ति ।  ते अञ्ञमञ्ञं पटिविरुद्धताय वत्तं न करोन्ति, बोधिअङ्गणादीनि असम्मट्ठानेव होन्ति, अनुपट्ठापितं पानीयं परिभोजनीयं ।  तत्रायं, गोचरगामे पिण्डाय चरिस्सामी ति पत्तचीवरं आदाय निक्खन्तो, सचे पस्सति वत्तं वा अकतं, पानीयघटं वा रित्तं, अथानेन वत्तं कातब्बं होति, पानीयं उपट्ठापेतब्बं, अकरोन्तो वत्तभेदे दुक्कटं आपज्जति, करोन्तस्स कालो अतिक्कमति, अतिदिवा पविट्ठो निट्ठिताय भिक्खाय किञ्चि न लभति, पटिसल्लानगतो पि सामणेन-दहरभिक्खूनं उच्चासद्देन सङ्घकम्मेहि विक्खिपति ।  यत्थ पन सब्बं वत्तं कतमेव होति, अवसेसा पि च संघट्टना नत्थि, एवरूपे महाविहारे पि विहातब्बं ।

४.  नवविहारे बहुं नवकम्मं होति, अकरोन्तं उज्झायन्ति ।  यत्थ पन भिक्खू एवं वदन्ति, आयस्मा यथासुखं समणधम्मं करोतु, मयं नवकम्मं करिस्सामा ति, एवरूपे विहातब्बं ।

५.  जिण्णविहारे पन बहुं पटिजग्गितब्बं होति, अन्तमसो अत्तनो सेनासनमत्तम्पि अपटिजग्गन्तं उज्झायन्ति, पटिजग्गन्तस्स कम्मट्ठानं परिहायति ।

६.  पन्थनिस्सिते महापथविहारे रत्तिन्दिवं आगन्तुका सन्निपतन्ति, विकाले आगतानं अत्तनो सेनासनं दत्वा रुक्खमूले वा पासणपिट्टे वा वसितब्बं होति, पुनदिवसे पि एवमेवा ति कम्मट्ठानस्स ओकासो न होति ।  यत्थ पन एवरूपो आगन्तुकसम्बाधो न होति, तत्थ विहातब्बं ।

७.  सोण्डि नाम पासाणपोक्खरणी होति ।  तत्थ पानीयत्थं महाजनो समोसरति, नगरवासीनं राजकुलूपकत्थेरानं अन्तेवासिका रजनकम्मत्थाय आगच्छन्ति, तेसं भाजनदारुदोणिकादीनि पुच्छन्तानं, असुके च असुके च ठाने ति दस्सेतब्बानि होन्ति, एवं सब्बकालम्पि निच्चब्यावटो होति ।

८.  यत्थ नानाविधं साकपण्णं होति, तत्थस्स कम्मट्ठानं गहेत्वा दिवाविहारं निसिन्नस्सापि सन्तिके साकहारिका गायमाना पण्णं उच्चिनन्तियो विसभागसद्दसंघट्टनेन कम्मट्ठानन्तरायं करोन्ति ।  यत्थ पन नानाविधा मालागच्छा सुपुप्फिता होन्ति, तत्रापि तादिसो येव उपद्दवो ।

९.  यत्थ नानाविधं अम्बजम्बुपनसादि फलं होति, तत्थ फलत्थिका आगन्त्वा याचन्ति, अदेन्तस्स कुज्झन्ति, बलक्कारेन वा गण्हनित ।  सायण्हसमये विहारमज्झे चङ्कमन्तेन ते दिस्वा, किं, उपासका, एवं करोथा ति वुत्ता यथारुचि अक्कोसन्ति, अवासाय पिस्स परक्कमन्ति ।

१०.  पत्थनीये पन लोकसम्मते दक्खिणगिरि-हत्थिकुच्छि-चेतियगिरि-चित्तलपब्बतसदिसे विहारे विहरन्तं, अयमरहा ति सम्भावेत्वा वन्दितुकामा मनुस्सा समन्ता ओसरन्ति, तेनस्स न फासु होति ।  यस्स पन तं सप्पायं होति, तेन दिवा अञ्ञत्थ गन्त्वा रत्तिं वसितब्बं ।

पुढे वाचा

यशवंतराव चव्हाण प्रतिष्ठान निर्मित महत्वपूर्ण संकेतस्थळे..