मुख्यपान » असुभकम्मट्ठाननिद्देसो
A+ R A-

असुभकम्मट्ठाननिद्देसो

ई-मेल प्रिंट
छट्ठो परिच्छेदो
असुभकम्मट्ठाननिद्देसो


१.  कसिणानन्तरं उदिट्ठेसु पन, उद्धुमातकं, विनीलकं, विपुब्बकं, विच्छिद्दकं, विक्खायितकं, विक्खित्तकं, हतविक्खित्तकं, लोहितकं, पुळुवकं, पट्ठिकं ति [३।१०५] दससु अविञ्ञाणकअसुभेसु, भस्ता विय वायुना, उद्धं जीवितपरियादाना यथानुक्कमं समुग्गतेन सूनभावेन उद्धुमातत्ता उद्धुमातं, उद्धुमातमेव उद्धुमातकं ।  पटिक्कूलत्ता वा कुच्दितं उद्धुमातं ति उद्धुमातकं ।  तथारूपस्स छवसरीरस्सेतं अधिवचनं ।

२.  विनीलं वुच्चति विपरिभिन्नवण्णं, विनीलमेव विनीलकं ।  पटिक्कूलत्ता वा कुच्छितं विनीलं ति विनीलकं ।  मंसुस्सदट्ठानेसु रत्तवण्णस्स, पुब्बसन्निचयट्ठानेसु सेतवण्णस्स, येभुय्येन च नीलवण्णस्स, नीलट्ठाने नीलसाटकपारुतस्सेव छवसरीरस्सेतं अधिवचनं ।

३.  परिभिन्नट्ठानेसु विस्सन्दमानपुब्बं विपुब्बं, विपुब्बमेव विपुब्बकं ।  पटिक्कूलत्ता वा कुच्दितं विपुब्बं ति विपुब्बकं ।  तथारूपस्स छवसरीरस्सेतं अधिवचनं ।

४.  विच्छिदं वुच्चति द्विधा छिन्दनेन अपवारितं, विच्छिद्दमेव विच्छिद्दकं ।  पटिक्कूलत्ता वा कुच्दितं विच्छिद्दं ति विच्छिदकं ।  वेमज्झे छिन्नस्स छवसरीरस्सेतं अधिवचनं ।

५.  इतो च एत्तो च विविधाकारेन सोणसिङ्गालादीहि खायितं ति विक्खायितं, विक्खायितमेव विक्खायितकं ।  पटिक्कूलत्ता वा कुच्छितं विक्खायितं ति विक्खायितकं ।  तथारूपस्स छवसरीरस्सेतं अधिवचनं ।

६.  विविधं खित्तं विक्खित्तं, विक्खित्तमेव विक्खित्तकं ।  परिक्कूलत्ता वा कुच्छितं विक्खित्तं ति विक्खित्तकं ।  अञ्ञेन हत्थं अञ्ञेन पादं अञ्ञेन सीसं ति एवं ततो ततो खित्तस्स छवसरीरस्सेतं अधिवचनं ।

७. हतञ्च तं पुरिमनयेनेव विक्खित्तकञ्चा ति हतविक्खित्तकं ।  काकपदाकारेन अङ्गपञ्चङ्गेसु सत्थेन हनित्वा वुत्तनयेन विक्खित्तस्स छवसरीरस्सेतं अधिवचनं ।

८.  लोहितं किरति विक्खिपति, इतो चितो च पग्घरती ति लोहितकं ।  पग्घरितलोहितमक्खितस्स छवसरीरस्सेतं अधिवचनं ।

९.  पुळुवा वुच्चन्ति किमियो ।  पुळुवे किरती ति पुळुवकं ।  किमिपरिपुण्णस्स छवसरीरस्सेतं अधिवचनं ।

१०.  अट्ठि येव अट्ठिकं, पटिक्कूलत्ता वा कुच्छितं अट्ठी ति अट्ठिकं ।  अट्ठिसङ्खलिकाय पि एकट्ठिकस्स पि एतं अधिवचनं ।

पुढे वाचा

यशवंतराव चव्हाण प्रतिष्ठान निर्मित महत्वपूर्ण संकेतस्थळे..