मुख्यपान » छअनुस्सतिनिद्देसो
A+ R A-

छअनुस्सतिनिद्देसो

ई-मेल प्रिंट
सत्तमो परिच्छेदो
छअनुस्सतिनिद्देसो


१.  असुभानन्तरं उद्दिट्ठासु पन दससु अनुस्सतिसु, पुनप्पुनं उप्पज्जनतो सति येव अनुस्सति ।  पवत्तितब्बट्ठानम्हि येव वा पवत्तत्ता सद्धापब्बजितस्स कुलपुत्तस्स अनुरूपा सती ति पि अनुस्सति ।  बुद्धं आरब्भ उप्पन्ना अनुस्सति बुद्धानुस्सति ।  बुद्धगुणारम्मणाय सतिया एतं अधिवचनं ।  धम्मं आरब्भ उप्पन्ना अनुस्सति धम्मानुस्सति ।  स्वाक्खाततादि-धम्मगुणारम्मणाय सतिया एतं अधिवचनं ।  सङ्घं आरब्भ उप्पन्ना अनुस्सति सङ्घानुस्सति ।  सुपटिपन्नतादिसङ्घगुणारम्मणाय सतिया एतं अधिवचनं ।  सीलं आरब्भ उप्पन्ना अनुस्सति सीलानुस्सति ।  अखण्डतादि-सीलगुणारम्मणाय सतिया एतं अधिवचनं ।  चागं आरब्भ उप्पन्नां अनुस्सति चागानुस्सति ।  मुत्तचागतादि-चागगुणारम्मणाय सतिया एतं अधिवचनं ।  देवता आरब्भ उपन्ना अनुस्सति देवतानुस्सति ।  देवता सक्खिट्ठाने ठपेत्वा अत्तनो सद्धादिगुणारम्मणाय सतिया एतं अधिवचनं ।  मरणं आरब्भ उप्पन्ना अनुस्सति मरणानुस्सति ।  जीवितिन्द्रियुपच्छेदारम्मणाय सतिया एतं अधिवचनं   केसादिभेदं रूपकायं गता, काये वा गता ति कायगता, कायगता च सा सति चा ति कायगतसती ति वत्तब्बे रस्सं अकत्वा कायगतासती ति वुत्ता ।  केसादि-कायकोट्ठासनिमित्तारम्मणाय सतिया एतं अधिवचनं ।  आनापाने आरब्भ उप्पन्ना सति आनापानसति ।  अस्सासपस्सासनिमित्तारम्मणाय सतिया एतं अधिवचनं ।  उपसमं आरब्भ उप्पन्ना अनुस्सति उपसमानुस्सति ।  सब्बदुक्खूपसमारम्मणाय सतिया एतं अधिवचनं ।

२.  इति इमासु दससु अनुस्सतिसु बुद्धानुस्सतिं ताव भावेतुकामेन अवेच्चप्पसादसमन्नागतेन योगिना पटिरूपे सेनासने रहोगतेन पटिसल्लीनेन, ''इति पि सो भगवा अरहं सम्मासबुद्धो विज्जाचरणसम्पन्नो सुगतो लोकविदू अनुत्तरो पुरिसदम्मसारति सत्था देवमनुस्सानं बुद्धो भगवा'' ति [अं ३।२८५] एवं बुद्धस्स भगवतो गुणा अनुस्सरितब्बा ।

३.  तत्रायं अनुस्सरणनयो ।  सो भगवा इति पि अरहं, इति पि सम्मासम्बुद्धो .... पे ..... इति पि भगवा ति अनुस्सरति ।  इमिना च इमिना च कारणेना ति वुत्तं होति ।

४.  तत्थ, आरकत्ता, अरीनं अरानञ्च हतत्ता, पच्चयादीनं अरहत्ता, पापकरणे रहाभावा ति इमेहि ताव कारणेहि सो भगवा अरहं ति अनुस्सरति ।

५.  आरका हि सो सब्बकिलेसेहि सुविदूरविदूरे ठितो, मग्गेन सवासनानं किलेसानं विद्धंसितत्ता ति आरकत्ता अरहं ।

सो ततो आरका नाम यस्स येनासमङ्गिता ।
असमङ्गी च दोसेहि नाथो तेनारहं मतो ति ॥

६.  ते च अनेन किलेसारयो मग्गेन हता ति अरीनं हतत्ता पि अरहं ।

यस्मा रागादिसङ्खाता सब्बे पि अरयो हता ।
पञ्ञासत्थेन नाथेन, तस्मा पि अरहं मतो ति ॥

पुढे वाचा

यशवंतराव चव्हाण प्रतिष्ठान निर्मित महत्वपूर्ण संकेतस्थळे..