मुख्यपान » ब्रह्मविहारनिद्देसो
A+ R A-

ब्रह्मविहारनिद्देसो

ई-मेल प्रिंट
नवमो परिच्छेदो
ब्रह्मविहारनिद्देसो


१.  अनुस्सतिकम्मट्ठानानन्तरं उद्दिट्ठेसु पन, मेत्ता करुणा मुदिता उपेक्खा ति इमेसु चतूसु ब्रह्मविहारेसु मेत्तं भावेतुकामेन ताव आदिकम्मिकेन योगावचरेन उपच्छिन्नपलिबोधेन गहितकम्मट्ठानेन भत्तकिच्चं कत्वा भत्तसम्मदं पटिविनोदेत्वा विवित्ते पदेसे सुपञ्ञत्ते आसने सुखनिसिन्नेन आदितो ताव दोसे आदीनवो खन्तियञ्च आनिसंसो पच्चवेक्खितब्बो ।

२.  कस्मा ?  इमाय हि भावनाय दासो पहातब्बो, खन्ति अधिगन्तब्बा, न च सक्का किञ्चि अदिट्ठादीनवं पहातुं अविदितानिसंसं वा अधिगन्तुं । तस्मा, ''दुट्ठो खा, आवुसो, दोसेन अभिभूतो परियदिण्णचित्तो पाणम्पि हन्ती '' ति [अं १।२१६] आदीनं सुत्तानं वसेन दोसे आदीनवो दट्ठब्बो,

''खन्ती परमं तपो तितिक्खा निब्बानं परमं वदन्ति बुद्धा '' [दी २।४९ ध १८४],
''खन्तिबलं बलानीकं, तमहं ब्रूमि ब्राह्मणं '' [ध ३९९],
''खन्त्या भिय्यो न विज्जती '' ति [सं १।२२२]

आदीनं वसेन खन्तियं आनिसंसो वेदितब्बो ।

३.  अथेवं दिट्ठादीनवतो दोसतो चित्तं विवेचनत्थाय विदितानिसंसाय च खन्तिया संयोजनत्थाय मेत्ताभावना आरभितब्बा ।  आरभन्तेन च आदितो व पुग्गलदोसा जानितब्बा, इमेसु पुग्गलेसु मेत्ता पठमं न भावेतब्बा, इमेसु नेव भावेतब्बा ति ।

४.  अयं हि मेत्ता, अप्पियपुग्गले अतिप्पियसहायके मज्झत्ते वेरिपुग्गले ति इमेसु चतूसु पठमं न भावेतब्बा, लिङ्गविसभागे ओधिसो न भावेतब्बा, कालङ्कते न भावेतब्बा व ।

५.  किंकारणा अप्पियादिसु पठमं न भावेतब्बा ?  अप्पियं हि पियट्ठाने ठपेन्तो किलमति, अतिप्पियसहायकं मज्झत्तट्ठाने ठपेन्तो किलमति, अप्पमत्तके पि चस्स दुक्खे उप्पन्ने आरोदनाकारप्पत्तो विय होति, मज्झत्तं गरुट्ठाने च पियट्ठाने च ठपेन्तो किलमति, वेरिमनुस्सरतो कोधो उप्पज्जति ।  तस्मा अप्पियादिसु पठमं न भावेतब्बा ।

६.  लिङ्गविसभागे पन तमेव आरब्भ ओधिसो भावेन्तसस रागो उप्पज्जति ।  अञ्ञतरो किर अमच्चपुतो कुलूपकत्थेर पुच्छि, भन्ते, कत्थ मेत्ता भावेतब्बा ति ?  थेरो, पियपुग्गले ति आह ।  तस्स च अत्तनो भरिया पिया होति, सो तस्सा मेत्तं भावेन्तो सब्बरत्तिं भित्तियुद्धमकासि ।  तस्मा लिङ्गविसभागे ओधिसो न भानेतब्बा ।

७.  कालङ्कते पन भावेन्तो नेव अप्पनं, न उपचारं पापुणाति ।  अञ्ञतरो किर दहरभिक्खु आचरियं आरब्भ मेत्तं आरभि ।  तस्स मेत्ता नप्पवत्तति ।  सो महाथेरस्स सन्तिकं गन्त्वा, भन्ते, पगुणा व मे मेत्ताझानसमापत्ति, न च नं समापज्जितुं सक्कोमि, किं नु खो कारणं ति आह ।  थेरो, निमित्तं, आवुसो, गवेसा ति आह ।  सो गवेसन्तो आचरियस्स मतभावं ञत्वा अञ्ञं आरब्भ मेत्तायन्तो समापत्तिं अप्पेसि ।  तस्मा कालङ्कते न भावेतब्बा व ।

पुढे वाचा

यशवंतराव चव्हाण प्रतिष्ठान निर्मित महत्वपूर्ण संकेतस्थळे..