मुख्यपान » पञ्ञाभूमिनिद्देसो
A+ R A-

पञ्ञाभूमिनिद्देसो

ई-मेल प्रिंट
सत्तरसमो परिच्छेदो
पञ्ञाभूमिनिद्देसो


१. इदानि, खन्धायतन-धातु-इन्द्रिय-सच्च-पटिच्चसमुप्पादादिभेदा धम्मा भूमी ति [१४|३२]  एवं वुत्तेसु इमिस्सा पञ्ञाय भूमिभूतेसु धम्मेसु, यस्मा पटिच्चसमुप्पादो चेव आदिसद्देन सङ्गहिता पटिच्चसमुप्पन्ना धम्मा च अवसेसा होन्ति, तस्मा तेसं वण्णनाक्कमो अनुप्पत्तो ।

२. तत्थ अविज्जादयो ताव धम्मा, पटिच्चसमुप्पादो ति वेदितब्बा । वुत्तं हेतं भगवता –  “कतमो च, भिक्खवे, पटिच्चसमुप्पादो ? अविज्जापच्चया, भिक्खवे, सङ्खारा, सङ्खारपच्चया विञ्ञाणं, विञ्ञाणपच्चया नामरूपं, नामरूपपच्चया सळायतनं, सळायतनपच्चया फस्सो, फस्सपच्चया वेदना, वेदनापच्चया तण्हा, तण्हापच्चया उपादानं, उपादानपच्चया भवो, भवपच्चया जाति, जातिपच्चया जरा-मरण-सोक-परिदेव-दुक्ख-दोमनस्सुपायासा सम्भवन्ति, एवमेतस्स केवलस्स दुक्खक्खन्धस्स समुदयो होति । अयं वुच्चति, भिक्खवे, पटिच्चसमुप्पादो” ति [ सं २|१ ] ।

३. जरामरणादयो पन, पटि समुप्पन्ना धम्मा ति वेदितब्बा । वुत्तं हेतं भगवता- “ कतमे च, भिक्खवे, पटिच्चसमुप्पन्ना धम्मा ? जरामरणं, भिक्खवे, अनिच्चं सङ्खतं पटिच्चसमुप्पन्नं खयधम्मं वयधम्मं विरागधम्मं निरोधधम्म | जाति, भिक्खवे....पे..भवो....उपादानं....तण्हा...  वेदना...फस्सो...सळायतनं...नामरूपं...विञ्ञाणं...सङ्खारा.... अविज्जा, भिक्खवे, अनिच्चा सङ्खता पटिच्चसमुप्पन्ना खयधम्मा वयधम्मा विरागधम्मा निरोधम्मा । इमे वुच्चन्ति, भिक्खवे, पटिच्चसमुप्पन्ना धम्मा” ति [ सं २।२६ ] ।

४. अयं पनेत्थ सङ्खेपो – पटिच्चसमुप्पादो ति पच्चयधम्मा वेदितब्बा, पटिच्चसमुप्पन्ना धम्मा ति तेहि तेहि पच्चयेहि निब्बत्तधम्मा ।

५. कथमिदं जानितब्बं ति चे, - भगवतो वचनेन । भगवता हि पटिच्चसमुप्पाद – पटिच्चसमुप्पन्नधम्मदेसनासुत्ते, “कतमो च, भिक्खवे, पटिच्चसमुप्पादो ? जातिपच्चया, भिक्खवे, जरामरणं । उप्पादा वा तथागतानं अनुप्पादा वा तथागतानं ठिता व सा धातु धम्मट्ठितता धम्मनियामता इदप्पच्चयता । तं तथागतो अभिसम्बुज्झति अभिसमेति, अभिसम्बुज्झित्वा अभिसमेत्वा आचिक्खति देसेति पञ्ञपेति पट्ठपेति विवरति विभजति उत्तानीकरोति, पस्सथा ति चाह – जातिपच्चया, भिक्खवे, जरामरणं । भवपच्चया, भिक्खवे, जाति...पे....अविज्जापच्चया, भिक्खवे सङ्खारा । उप्पादा वा तथागतानं....पे....विभजति उत्तानीकरोति, पस्सथा ति चाह – अविज्जापच्चय, भिक्खवे, सङ्खारा । इति खो भिक्खवे या तथता अवितथता अनञ्ञथता इदप्पच्चयता, अयं वुच्चति, भिक्खवे, पटिच्चसमुप्पदो” ति [ सं २।२५-२६ ]  एवं पटिच्चसमुप्पादं देसेन्तेन तथतादीहि वेवचनेहि पच्चयधम्मा व पटिच्चसमुप्पादो ति वुत्ता । तस्मा, जरामरणादीनं धम्मानं पच्चयलक्खणो पटिच्चसमुप्पादो, दुक्खानुबन्धनरसो, कुम्मग्गपच्चुपट्ठानो ति वेदितब्बो ।

६. सो पनायं तेहि तेहि पच्चयेहि अनूनाधिकेहेव तस्स तस्स धम्मस्स संम्भवतो तथता ति, सामग्गिउपगतेसु पच्चयेसु मुहुत्तम्पि ततो निब्बत्तनधम्मानं असम्भवाभावतो अवितथता ति, अञ्ञधम्मपच्चयेहि अञ्ञधम्मानुप्पत्तितो अनञ्ञथता ति, तथावुत्तानं एतेसं जरामरणादीनं पच्चयतो वा पच्चयसमूहतो वा इदप्पच्चयता ति वुत्तो ।

पुढे वाचा

यशवंतराव चव्हाण प्रतिष्ठान निर्मित महत्वपूर्ण संकेतस्थळे..