मुख्यपान » दिट्ठिविसुद्दिनिद्देसो
A+ R A-

दिट्ठिविसुद्दिनिद्देसो

ई-मेल प्रिंट
अट्ठारसमो परिच्छेदो
दिट्ठिविसुद्धिनिद्देसो


१.    इदानि या, इमेसु भूमिभूतेसु धम्मेसु उग्गहपरिपुच्छावसेन ञाणपरिचयं कत्वा सीलविसुद्धि चेव चित्तविसुद्धि चा चि व्दे मूलभूता विसुद्धियो सम्पादेब्बा ति वुत्ता [ १४।३२ ], तत्थ सीलविसुद्धि नाम सुपरिसुद्धं पातिमोक्खसंवरादिचतुब्बिधं सीलं, तञ्च सीलनिद्देसे वित्थारितमेव । चित्तविसुद्धि नाम सउपचारा, अट्ठ  समापत्तियो, ता पि चित्तसीसेन वुत्तसमाधिनिद्देसे सब्बाकारेन वित्थारिता एव । तस्मा ता तत्थ वित्थारीतनयेनेव वेदितब्बा ।
२.    यं पन वुत्तं, दिट्ठिविसुद्धि, कङ्खावितरणविसुद्धि, मग्गामग्गञाणदस्सनविसुद्धि, पटिपदाञाणदस्सनविसुद्धि, ञाणदस्सनविसुद्धी ति इमा पञ्च विसुद्धियो सरीरं ति [ १४।३२ ], तत्थ नामरूपानं याथावदस्सनं दिट्ठिविसुद्धि नाम ।
३.    तं सम्पादेतुकामेन समथयानिकेन ताव, ठपेत्वा नेवसञ्ञानासञ्ञायतनं अवसेसरूपावचरज्झानानं अञ्ञतरतो वुट्ठाय वितक्कादीनि झानङ्गानि तंसम्पयुत्ता च धम्मा लक्खणरसादिवसेन परिग्गहेतब्बा । परिग्गहेत्वा, सब्बम्पेतं आरम्मणाभिमुखनमनतो नमनट्ठेन नामं ति ववत्थपेतब्बं ।
४.    ततो , यथा नाम पुरिसो अन्तोगेहे सप्पं दिस्वा तं अनुबन्धमानो तस्स आसयंपस्सति, एवमेव अयम्पि योगावचरो तं नामं उपपरिक्खन्तो, इदं नामं किं निस्साय पवत्तती ति परियेसमानो तस्स निस्सयं हदयरुपं पस्सति, ततो हदयरूपस्स निस्सयभूतानि भूतनिस्सितानि च सेसुपादारूपानी ति रूपं परिगण्हाति । सो सब्बम्पेतं रूप्पनतो रूपं ति ववत्थपेति, ततो नमनलक्खणं नामं, रूप्पनलक्खणं रूपं ति सङ्खेपतो नामरूपं ववत्थपेति ।
५.    सुद्धविपस्सनायानिको पन, अयमेव वा समथयानिको चतुधातुववत्थाने वुत्तानं तेसं तेसं धातुपरिग्गहमुखानं अञ्ञतरमुखवसेन सङ्खेपतो वा वित्थारतो वा चतस्सो धातुयो परिगण्हाति ।अथस्स याथावसरसलक्खणतो आविभूतासु धातुसु कम्मसमुट्ठानम्हि ताव केसे, चतस्सो धातुयो, वण्णो, गन्धो, रसो, ओजा, जीवितं, कायप्पसादो ति एवं कायदसकवसेन दस रूपानि, तत्थेव भावस्स अत्थिताय भावदसकवसेन दस, तत्थेव आहारसमुट्ठानं ओजट्ठमकं, उतुसमुट्ठानं चित्तसमुट्ठानं ति अपरानि पि चतुवीसती ति एवं चतुसमुट्ठानेसु चतुवीसति कोट्ठासेसु चतुचत्तालीस चतुचत्तालीस रूपानि, सेदो, अस्सु, खेळो, सिङ्घाणिका ति इमेसु पन चतूसु उतुचित्तसमुट्ठानेसु द्विन्नं ओजट्ठमकानं वसेन सोळस सोळस रूपानि, उदरियं, करिसं, पुब्बो, मुत्तं ति इमेसु चतूसु उतुसमुट्ठनेसु उतुसमुट्ठानस्सेव ओजट्ठकम्मस्स वसेन अट्ठ अट्ठ रूपानि पाकटानि होन्ती ति । एस ताव द्वत्तिंसाकारे नयो ।

६.    ये पन इमस्मिं द्वत्तिंसाकारे आविभुते अपरे दस आकारा आविभवन्ति , तत्थ असितादिपरिपाचके ताव कम्मजे तेजोकोट्ठासम्हि, ओजट्ठमकञ्चेव जीवितञ्च ति नव रूपानि, तथा चित्तजे अस्सासपस्साकोट्ठासे पि, ओजट्ठमकञ्चेव सद्धो चा ति नव, सेसेसु चतुसमुट्ठानेसु अट्ठसु, जीवितनवकञ्चेव तीणि च ओजट्ठमकानी ति तेत्तिंस तेत्तिंस रूपानि पाकटानि होन्ति ।

७.    तस्सेवं वित्थारतो द्वाचत्तालीसाकारवसेन इमेसु भूतूपादायरूपेसु  पाकटेसु जातेसु, वत्थुव्दारवसेन पञ्च चक्खुदसकादयो हदयवत्थुदसकञ्चा ति अपरानि पि सट्ठि रूपानि पाकटानि होन्ति । सो सब्बानि पि तानि रूप्पनलक्खणेन एकतो कत्वा, एतं रूपं ति पस्सति ।

पुढे वाचा

यशवंतराव चव्हाण प्रतिष्ठान निर्मित महत्वपूर्ण संकेतस्थळे..