मुख्यपान » कङ्खवितरणविसुद्धिनिद्देसो
A+ R A-

कङ्खवितरणविसुद्धिनिद्देसो

ई-मेल प्रिंट
एकूनवीसतिमो परिच्छेदो
कङ्खवितरणविसुद्धिनिद्देसो


१.    एतस्सेव पन नामरूपस्स पच्चयपरिग्गहणेन तीसु अद्धासु कङ्खं वितरित्वा ठितं ञाणं कड्खावितरणविसुद्धि नाम !

२.    तं सम्पादेतुकामो भिक्खु, यथा नाम कुसलो भिसक्को रोगं दिस्वा तस्स समुट्ठानं परियेसति, यथा वा पन अनुकम्पको पुरिसो मन्दं कुमारं दहरं उत्तानसेय्यकं रथिकाय निपन्नं दिस्वा कस्स नु खो अयं पुत्तको ति तस्स मातापितरो आवज्जति, एवमेव तस्स नामरूपस्स हेतुपच्चयपरियेसनं आपज्जति ।

३.    सो आदितो व इति पटिसञ्चिक्खति – न ताविदं नामरूपं अहेतुकं सब्बत्थ सब्बदा सब्बेसञ्च एकसदिसभावापत्तितो, न इस्सरादिहेतुकं नामरूपतो उद्धं इस्सरादीनं अभावतो, ये पि, नामरूपमत्तमेव इस्सदायो ति वदन्ति, तेसं इस्सरादिसड्खातनामरूपस्स अहेतुकभावापत्तितो । तस्मा भवितब्बमस्स हेतुपच्चयेहि । के नु खो ते ति?

४.    सो एवं नामरूपस्स हेतुपच्चये आवज्जित्वा इमस्स ताव रूपकायस्स एवं हेतुपच्चये परिगण्हाति – अयं कायो निब्बत्तमानो नेव उप्पल-पदुम-पुण्डरीक-रोगन्धिकादीनं अब्भन्तरे निब्बत्तति, न मणिमुत्ताहारादीनं, अथ खो आमासयपक्कासयानं अन्तरे, उदरपटलं पच्छतो पिट्ठिकण्टकं पुरतो कत्वा अन्त-अन्तगुणपरिवारितो सयम्पि दुग्गन्धजेगुच्छपटिक्कूलो दुग्गन्धजेगुच्छपटिक्कूले परमसम्बाधे ओकोसे पूतिमच्छ-पूतिकुणप-पूतिकुम्मास-ओळिगल्ल-चन्दनिकादिसु किमि विय निब्बत्तति । तस्सेवं निब्बत्तमानस्स, अविज्जा तण्हा उपादानं कम्मं ति इमे चत्तारो धम्मा निब्बत्तकत्ता हेतु, आहारो उपत्थम्भकता पच्चयो ति पञ्च धम्मा हेतुपच्चया होन्ति । तेसु पि अविज्जादयो तयो इमस्स कायस्स माता विय दारकस्स उपनिस्सया होन्ति, कम्मं पिता विय पुत्तस्स जनकं, आहारो धाती विय दारकस्स सन्धारको ति ।

५. एवं रूपकायस्स पच्चयपरिग्गहं कत्वा पुन, “चक्खुञ्च पटिच्च रूपे च उप्पज्जति चक्खुविञ्ञाणं” ति [ सं २|७२] आदिना नयेन नामकायस्स पच्चयपरिग्गहं करोति । सो एवं पच्चयतो नामरूपस्स पवत्तिं दिस्वा, यथा इदं एतरहि, एवं अतीते पि अद्धाने पच्चयतो पवत्तित्थ, अनागते पि पच्चयतो पवत्तिस्सती ति समनुपस्सति ।

६. तस्सेवं समनुपस्सतो, या सा पुब्बन्तं आरब्भ, “ अहोसिं नु खो अहं अतीतमद्धानं, न नु खो अहोसिं अतीतमद्धानं, किं नु खो अहोसिं अतीतमद्धानं, कथं नु खो अहोसिं अतीतमद्धानं, किं हुत्वा किं अहोसिं नु खो अहं अतीतमद्धानं” ति [म १।८] पञ्चविधा विचिकिच्छा वृत्ता, या पि अपरन्तं आरब्भ, “भविस्सामि नु खो अहं अनागतमद्धानं, न नु खो भविस्सामि अनागतमद्धानं, किं नु खो भविस्सामि अनागतमद्धानं, कथं नु खो भविस्सामि अनागतमद्धानं, किं हुत्वा किं भविस्सामि नु खो अहं अनागतमद्धानं” ति [म १।८] पञ्चविधा विचिकिच्छा वृत्ता, या पि पच्चुपन्नं आरब्भ, “ एतरहि वा पन पच्चुप्पन्नं अद्धानं अज्झतं कथंकथी होति, अहं नु खोस्मि, नो नु खोस्मि, किं नु खोस्मि, कथं नु खोस्मि, अयं नु खो सत्तो कुतो आगतो, सो कुहि गामी भविस्सती” ति [म १।८] छब्बिधा विचिकिच्छा वुत्ता,- सा सब्बा पि पहीयति ।

७. अपरो साधारणासांधारणवसेन दुबिधं नामस्स पच्चयं पस्सति, कम्मादिवसेन चतुब्बिधं रूपस्स ।

८. दुविधो हि नामस्स पच्चयो, साधारणो असाधारणो च । तत्थ चक्खादीनि छद्वारानि, रूपादीनि छ आरम्मणानि नामस्स साधारणो पच्चयो कुसलादिभेदतो सब्बप्पकारस्मापि ततो पवत्तितो, मनसिकारादिको असाधारणो । योनिसोमनसिकार-सद्धम्मसवनादिको हि कुसलस्सेव होति, विपरीतो अकुसलस्स, कम्मादिको विपाकस्स, भवड्गांदिको किरियस्सा ति ।

९. रूपस्स पन, कम्मं चित्तं उतु आहारो ति अयं कम्मादिको चतुब्बिधो पच्चयो । तत्थ कम्मं अतीतमेव कम्मसमुठ्ठानस्स रूपस्स पच्चयो होति । चित्तं चित्तसमुट्ठानस्स उप्पज्जमान, उतू-आहारा उतु-आहारसमुट्ठानस्स ठितिक्खणे पच्चया होन्ति । एवमेको नामरूपस्स पच्चयपरिग्गहं करोति ।

१०. सो एवं पच्चयतो नामरूपस्स पवत्तिं दिस्वा, यथा इदं एतरहि, एवं अतीते पि अद्धाने  पच्चयतो पवत्तित्थ, अनागते पि पच्चयतो पवत्तिस्सती ति समनुपस्सति । तस्सेवं समनुपस्सतो वृत्तनयेनेव तीसु अद्धासु विचिकिच्छा पहीयति ।

११. अपरो तेसं येव नामरूपसड्खांतानं सड्खारानं जरापत्तिं, जिण्णानञ्च भड्गं दिस्वा, इदं सङ्खारानं जरामरणं नाम जातिया सति होति, जाति भवे सति, भवो उपादाने सति, उपादानं तण्हायं सति, तण्हा वेदनाय सति, वेदना फस्से सति, फस्सो सळायतने सति, सळायतनं नामरूपे सति, नामरूपं विञ्ञाणे सति, विञ्ञाणं सङ्खारेसु सन्तेसु, सङ्खारा अविज्जाय सती ति एवं पटिलोमपटिच्चसमुप्पादवसेन नामरूपस्स पच्चयपरिग्गहं करोति। अथस्स वृत्तनयेनेव विचिकिच्छा पहीयति ।

पुढे वाचा

यशवंतराव चव्हाण प्रतिष्ठान निर्मित महत्वपूर्ण संकेतस्थळे..