मुख्यपान » ञाणदस्सनविसुद्धिनिद्देसो
A+ R A-

ञाणदस्सनविसुद्धिनिद्देसो

ई-मेल प्रिंट
बावीसतिमो परिच्छेदो
ञाणदस्सनविसुद्धिनिद्देसो


१. इतो परं गोत्रभूञाणं होति | तं मग्गस्स आवज्जनट्ठानियत्ता नेव पटिपदाञाणदस्सनविसुद्धिं न ञाणदस्सनविसुद्धिं भजति, अन्तरा अब्बोहारिकमेव होति, विपस्सनासोते पतितत्ता पन विपस्सना ति सड्खं गच्छति |

२. सोतापत्तिमग्गो, सकदागामिमग्गो,अनगामिमग्गो,अरहत्तमग्गो ति इमेसु पन चतूसु मग्गेसु ञाणं ञाणदस्सनविसुद्धि नाम |

३. तत्थ पठममग्गञाणं ताव सम्पदेतुकामेन अञ्ञं किञ्चि कातब्बं नाम नत्थि | यं हि नेन कातब्बं सिया, तं अनुलोमावसानं विपस्सनं उप्पादेन्तेन कतमेव |

४. एवं उप्पन्नअनुलोमञाणस्स पनस्स तेहि तीहि पि अनुलोमञाणेहि अत्तनो बलानुरूपेन थूलथूले सच्चपटिच्छादके तमम्हि अन्तरधापिते सब्बसङ्खारगतेसु चित्तं न पक्खन्दति, न सन्तिट्ठति, नाधिमुच्चति, न सज्जति, न लग्गति, न बज्झति, पदुमपलासतो उदकं विय पटिलीयति, पटिकुटति, पटिवट्टति, सब्बं निमित्तारम्मणम्पि सब्बं पवत्तारम्मणम्पि पलीबोधतो उपट्ठति |

५. अथस्स सब्बस्मिं निमित्तपवत्तारम्मणे पलिबोधतो उपट्ठिते अनुलोमञाणस्स आसेवनन्ते अनिमित्तं अप्पवत्तं विसङखारं निरोधं निब्बानं आरम्मणं कुरुमानं, पुथुज्जनगोत्तं पुथुज्जनसङ्ख  पुथुज्जनभूमिं अतिक्कममानं, अरियगोत्तं अरियसङ्खं अरियभूमिं ओक्कममानं निब्बानारम्मणे पठमावट्टन-पठमाभोग-पठमसमन्नाहारभूतं मग्गस्स अनन्तर-समनन्तरासेवन-उपनिस्सय-नत्थि-विगतवसेन छहि आकारेहि पच्चयभावं साधयमानं सिखाप्पत्तं विपस्सनाय मुद्धभूतं अपुनरावट्टकं उप्पज्जति गोत्रभूञाणं, यं सन्धाय वुत्तं – “कथं बहिद्धा वुट्ठानविवट्टने पञ्ञा गोत्रभूञाणं ? उप्पादं अभिभुय्यती ति गोत्रभू, पवत्तं....पे.....उपायासं अभिभुय्यती ति गोत्रभू....बहिद्धा सङ्खारानिमित्तं अभिभुय्यती ति गोत्रभू, अनुप्पादं पक्खन्दती ति गोत्रभू, अप्पवत्तं....पे....अनुपायासं निरोधं निब्बानं पक्खन्दती ति गोत्राभू, उप्पादं अभिभुय्यित्वा अनुप्पादं पक्खन्दती ति गोत्रभू” ति [ पटि  १|६६ ] सब्बं वित्थारेतब्बं |

६. तत्रायं एकावज्जनेन एकवीथियं पवत्तमानानम्पि अनुलोमगोत्रभूनं नानारम्मणे पवत्तनाकारदीपिका उपमा | यथा हि महामातिकं लङ्घित्वा परतीरे पतिट्ठातुकामो पुरिसो वेगेन धावित्वा मातिकाय ओरिमतीरे रुक्खसाखाय बन्धित्वा ओलम्बितं रज्जुं वा यट्ठिं वा गहेत्वा उल्लङ्घित्वा परतीरनिन्नपोणपब्भारकायो हुत्वा परतीरस्स उपरिभागं पत्तो तं मुथञ्चित्वा वेधमानो परतीरे पतित्वा सणिकं पतिट्ठाति, एवमेवायं योगावचरो पि भव-योनि-गति-ठिति-निवासानं परतीरभूते निब्बाने पतिट्ठातुकामो उदयब्बयानुपस्सनादिना वेगेन धावित्वा अत्तभावरुक्खसाखाय बन्धित्वा ओलम्बितं रुपरतज्जुं वा वेदनादिसु अञ्ञतरदण्डं वा, अनिच्चं ति वा दुक्खं ति वा अनत्ता ति वा अनुलोमावज्जनेन गहेत्वा तं अमुञ्चमानो व पठमेन अनुलोमचित्तेन उल्लड्घित्वा दुतियेन परतीरनिन्नपोणपब्भारकायो विय निब्बाननिन्नपोणपब्भारमानसो हुत्वा ततियेन परतीरस्स उपरिभागं पत्तो विय इदानि पत्तब्बस्स निब्बानस्स आसन्नो हुत्वा तस्स चित्तस्स निरोधेन तं सङ्खारारम्मणं मुञ्चित्वा गोत्रभूचित्तेन विसङ्खारे परतीरभूते निब्बाने पतति, एकारम्मणे पन अलद्धसेवनताय वेधमानो सो पुरिसो विय न ताव सुप्पतिट्ठितो होति, ततो मग्गञाणेन पतिट्ठाती ति |

७. तत्थ अनुलोमं सच्चपटिच्छादकं किलेसतमं विनोदेतुं सक्कोति, न निब्बानमारम्मणं कातुं | गोत्रभू निब्बानमेव आरम्मणं कातुं सक्कोति, न सच्चपटिच्छादकं तमं विनोदेतुं |

८. तत्रायं उपमा | एको किर चक्खुमा पुरिसो, नक्खत्तयोगं जानिस्सामी ति रत्तिभागे निक्खमित्वा चन्दं पस्सितुं  उध्दं उल्लोकेसि | तस्स वलाहकेहि पटिच्छन्नत्ता चन्दो न पञ्ञायित्थ | अथेको वातो उट्ठहित्वा थूलथूले | वलाहके विध्दंसेसि, अपरो मज्झिमे, अपरो सुखुमे पि | ततो सो पुरिसो विगतवलाहके नभे चन्दं दिस्वा नक्खत्तयोगं अञ्ञासि |

९. तत्थ तयो वलाहका विय सच्चपटिच्छादकं थूल-मज्झिम-सुखुमं किलेसन्धकारं | तयो वाता विय तीणि अनुलोमचित्तानि | चक्खुमा पुरिसो विय गोत्रभूञाणं | चन्दो विय निब्बानं | एकेकस्स वातस्स यथाक्कमेन वलाहकविध्दंसनं विय एकेकस्स अनुलोमचित्तस्स सच्चपटिच्छादकतमविनोदनं | विगतवलाहूके नभे तस्स पुरिसस्स विसुध्दचन्ददस्सनं विय विगते सच्चपटिच्छादके तमे गोत्रभूञाणस्स विसुध्दनिब्बानदस्सनं |

पुढे वाचा

यशवंतराव चव्हाण प्रतिष्ठान निर्मित महत्वपूर्ण संकेतस्थळे..