मुख्यपान » पञ्ञाभावनानिसंसनिद्देसो
A+ R A-

पञ्ञाभावनानिसंसनिद्देसो

ई-मेल प्रिंट
तेवीसतिमो परिच्छेदो
पञ्ञाभावनानिसंसनिद्धेसो


१. यं पन वुत्तं, पञ्ञाभावनाय को आनिसंसो ति [ १४।१ ], तत्थ वदाम--- अयं हि पञ्ञाभावना नाम अनेकसतानिसंसा । तस्मा दीघेनापि अद्वुना न सुकरं वित्थारतो अनिसंसं पकासेतुं । सङ्खेपतो पनस्सा, नानाकिलेसविद्धंसनं, अरियफलरसानुभवनं, निरोधसमापत्तिसमापज्जनसमत्थता, आहुनेय्यभावादिसिद्धी ति अयमानिसंसो वेदितब्बो ।

२. तत्था, यं नामरूपपरिच्छेदतो पट्ठाय सक्कायदिट्ठादिवसेन नानाकिलेसविद्धंसनं वुत्तं, अयं लोकिकाय पञ्ञाभावनाय अनिसंसो । यं अरियमग्गक्खणे संयोजनादीनं वसेन नानाकिलेसविद्धंसनं वुत्तं, अयं लोकुत्तराय पञ्ञाभावनाय अनिसंसो ति वेदितब्बो ।

भीमवेगानुपतिता असनीव सिलुच्चये ।
वायुवेगसमुट्ठितो अरञ्ञमिव पावको ।।
अन्धकारं विय रवि सतेजुज्जलमण्ङलो ।
दीघरत्तानुपतितं सब्बानत्थविधायकं ।।
किलेसजालं पञ्ञा आनिसंसमिमं इध ||
सन्दिट्ठिकमतो जञ्ञा आनिसंसमिमं इध ।।

३. अरियफलरसानुभवनं ति न केवलञ्च किलेसविद्धंसनं येव अरियफलरसानु भवनम्पि पञ्ञाभावनाय आनिसंसो । अरियफलं ति हि सोतापत्तिफलादि सामञ्ञफलं वुच्चति। तस्स व्दिहाकारेहि रसानुभवनं होति, मग्गविथियञ्च, फलसमापत्तिवसेन च पवत्तियं | तत्रस्स मग्गविथियं पवत्ति दस्सिता येव [ २२|१५-१७ ]|

४. अपि च ये,  संयोजनप्पहानमत्तमेव फलं नाम, न कोचि अञ्ञो धम्मो अत्थी ति वदन्ति, तेसं अनुनयत्थं इदं सुत्तम्पि दस्सेतब्बं--- “कथं पयोगपटिप्पस्सद्धिपञ्ञा फले ञाणं ? सोतापत्तिमग्गक्खणे दस्सनट्ठेन सम्मादिट्ठि मिच्छादिट्ठिया वुट्ठाति, तदनुवत्तककिलेसेहि च खन्धेहि च वुट्ठाति, बहिद्धा च सब्बनिमित्तेहि वुट्ठाति, तंपयोगपटिप्पस्सद्धत्ता उप्पज्जति सम्मादीट्ठि, मग्गस्सेतं फलं ” ति [ पटि १।७१ ] वित्थारेतब्बं । “चत्तारो अरियमग्गा, चत्तारि च सामञ्ञफलानि, इमे धम्मा अप्पमाणारम्मणा” [ धम्म २३९  ], “महग्गतो धम्मो अप्पमाणस्स धम्मस्स अनन्तरपच्चयेन पच्चयो” ति [ पट्ठान २।४३१ ] एवमादीनि पि चेत्थ साधकानि ।

५. फलसमापत्तियं पवत्तिदस्सनत्थं पनस्स इदं पञ्हाकम्मं--- का फलसमापत्ति ? के तं समापज्जन्ति, के न समापज्जन्ति ? कस्मा समापज्जन्ति ? कथञ्चस्सा समापज्जनं होति, कथं ठानं, कथं वुट्ठानं ? किं फलस्स अनन्तरं, कस्स च फलं अनन्तरं ति ?

६. तत्थ, का फलसमापत्ती ति ? या अरियफलस्स निरोधे अप्पना । के तं समापज्जन्ति, के न समापज्जन्ती ति ? सब्बे पि पुथुज्जना न समापज्जन्ति । कस्मा ? अनधिगतत्ता । अरिया पन सब्बे पि समापज्जन्ति । कस्मा ? अधिगतत्ता । उपरिमा पन हेट्ठिमं न समापज्जन्ति, पुग्गलन्तर भावूपगमनेन पटिपस्सद्धत्ता, हेट्ठिमा च उपरिमं, अनधिगतत्ता । अत्तनो अत्तनो येव पन फलं समापज्जन्ती ति इदमेत्थ सन्निट्ठानं ।

७. केचि पन, सोतापन्नसकदागामिनो पि न समापज्जन्ति, उपरिमा द्वे येव समापज्जन्ती ति वदन्ति । इदञ्च तेसं कारणं—एते हि समाधिस्मिं परिपुरकारिनो ति । तं पुथुज्जनस्सापि अत्तना पटिलद्वलोकियसमाधिसमापज्जनतो अकारणमेव । किञ्चेत्थ कारणाकारणचिन्ताय ? न नु पाळियं येव वुत्तं --- “कतमे दस गोत्रभूधम्मा विपस्सनावसेन उप्पज्जन्ति ? सोतापत्तिमग्ग पटिलाभत्थाय उप्पादं, पवत्तं....पे....उपायासं, बहिद्धा सङ्खारनिमित्तं अभिभुय्यती ति गोत्रभू । सोतापत्तिफलसमापत्तत्थाय....सकदागामिमग्ग....पे.... अरहत्तफलसमापत्तत्थाय... सुञ्ञतविहारसमापत्तत्थाय... अनिमित्तविहारसमापत्तत्थाय उप्पादं... पे... बहिद्धा सङ्खारनिमित्तं अभिभूय्यती ति गोत्रभू” ति [ पटि १।६८ ] ? तस्मा, सब्बे पि अरिया अत्तनो फलं समापज्जन्ती ति निट्ठमेत्थ गन्तब्बं ति ।

पुढे वाचा

यशवंतराव चव्हाण प्रतिष्ठान निर्मित महत्वपूर्ण संकेतस्थळे..